มงคลคำสอนอีสาน38

มงฺคลํ อุตฺตมํ เสฏฐํ อันว่ามงคลนั้นความอุดมความประเสริฐ
พุทธองค์ทรงเทศน์ไว้ให้เฮาได้ฮ่ำเพิง
อเสวนา จ พาลานํ อย่าได้ไปอยู่ใกล้ เป็นหมู่กับคนพาลแม่ใหญ่เอ๋ย
ชาติแต่แนวบ่ดีให้หลีกใกล้หนีเว้น
ปณฺฑิตานญฺ จ เสวนา นั้น ชาติเมธาเซื้อบัณฑิตตนนักปราชญ์
ผู้ฉลาดฮอบฮู้ให้เอาเก่อกล่อมสหายพี่น้องเอย
ปูชา จ ปูชนียานํ คนดีนั้นควรบูชาเอาแบบอย่าง หย่างตามหลังผู้จั่งซั่น มีแต่ได้สิบ่เสีย
ปฏิรูปเทสวาโส อยู่ในเขตประเทศที่สมบูรณ์ ทั้งบุคคลและสิ่งของ ล้วนแต่แนวดีพร้อม
ปุพฺเพ จ กตปุญญตา บุญคุณสร้างบารมีพร้อมพร่ำ ทำแต่ดีจั่ย ๆ ไผบ่หย่องกะซางตาม........
อตฺตสมฺมาปณิธิ จ ตั้งตนไว้หมั่นเที่ยงในความดี บ่มีใจเอนเอียงหวั่นไหวไปทางฮ้าย
ไผสิติทั้งค้ายทั้งเมืองกะบ่เงี่ยง มีแต่ตั้งเที่ยงไว้บ่ไลถิ่มฝ่ายดี พ่อใหญ่แม่ใหญ่เอย...
พหุสจฺจญฺจ นี้ ได้เฮียนฮ่ำมาหลายซั่นแหล๋ว ได้สดับรับฟังใส่ใจอยู่เลิงเรื่อย
สิปฺปญฺจ พร้อม มีศิลปะศาสตร์ มีวิชาชีพครบถ้วน ชำนาญพร้อมสู่ภาย
วินโย จ สุกฺขิโต นั้นเพิ่นบอกว่าวินัยดี ได้ฝึกฝนอบรมตน ระเบียบงามมวลพร้อม
สุภาสิตา จ ยา วาจา อันว่าความขานเว้ามีคุณธรรมล่ำค่า
เป็นของฝากจากลุ่มฟ้ามาต้อนต่อนสะเหน พ่อใหญ่แม่ใหญ่เอย....
มาตาปิตุอุปฏฺฐานํ บรบัติเลี้ยงพ่อแม่ของเฮา อย่าได้เฮ็ดทำแนวขวาง ให้เพิ่นเคืองคำฮ้อน
อย่าได้วาจาเว้าให้สองเขือน้ำตาหลั่ง บาปท่อฟ้าเวรกล้ำท่อแผ่นดินพุ้นแหล๋ว
 
 
ปุตฺตทารสฺส สงฺคโห มีลูกเต้าให้แอบแต่ทางที่ดี อย่าได้ฝึกเอาแต่ใจต่ำไปมันสิยาก
ตามแต่ใจเลิงเรื่อยภายลุนสิสอนยาก บอกบ่ได้เมื่อหน้าสิบ่ดี
อนากุลา จ กมฺมนฺตา การงานค้างอากูรบ่แล้วทั่ว ของมันพอสิแล้วอย่าป๋าไว้ให้ยากมือ
ทานํ นั้นให้เจ้าแต่งแปลงทาน ฝึกหัดจิตใจให้ปล่อยวางอยู่เลิงเรื่อย
ธมฺมจริยา จ นั้นเจ้าอย่าได้ไลลาเว้น คลองธรรมพระเจ้ากล่าว ทุกค่ำเช้าให้เฮียนฮู้เฮ็ดนำ
ทุกค่ำเช้าให้ตั้งอยู่ในธรรม สุจริตซื่อตรงซั่วซีวันเมี้ยน
ญาตกานญฺจ สงฺคโห นั้น อย่าพากันขี่ถี่ พุ้นแม่นพี่นี้แม่นน้อง ปองดองฮักแก่น
ถึงยามทุกข์ยากแค้นให้เพียรซ่วนซอยกัน อ้ายน้องเอย...
อนวชฺชานิ กมฺมานิ เวียกเฮ็ดสร้างบ่ให้มีโทษกับไผ กิจขัดงามโทษบ่มีพอน้อย
อารตี วิรตี ปาปา นั้น บ่มีกรรมสร้างก่อ บาปท่อก้อยเพียรเว้นหลีกไกล
มชฺชปานา จ สญฺญโม ของเมานั้นมีโทษนานา สารพันบ่ฮอนหามากิน สูบดมอมเคี้ยว
มันสิพาเฮาล่มตกจมเป็นทาส ออกบ่ได้กะผองเฒ่าแก่ตาย
อปฺปมาโท จ ธมฺเมสุ ตั้งใจหมั่นบ่ประมาทเผลอเลอ มีสติอยู่สู่ยามมวลพร้อม
ถนอมใจไว้ในครองพุทโธวาท บ่ประมาทท่อก้อย ธรรมพระเจ้าเพิ่นสั่งสอน
คารโว นั้น ให้เจ้าฮู้จักอ่อนน้อมเคารพย่ำแยง แสดงถึงกิริยาบอกค่าคุณควรฮู้
บุคคลพร้อมกิจการต่าง ๆ ฮู้จักคุณค่าพร้อมถนอมไว้สู่ภาย ออกจากหั่น มีคำว่า
 
 
นิวาโต อย่าได้โว ๆ เสียงเหลื่อนทั้งค้าย
ให้เจ้ายอมือไหว้แสดงความนบนอบ หมอบ ๆ เข้าหัวสิเท้าง่ายางอ้ายน้องเอย.....
สนฺตุฏฺฐี นั้น ให้มีความสันโดษ อย่าสิโพดแต่ยากได้ จนทำให้ฮ่วนเฮ
ให้เจ้าพอใจพร้อมในสิ่งที่เฮามี ให้มีความยินดีแต่สิ่งของที่เฮาได้
มันสิพาทำให้จิตใจเฮาม่วนซื่น สุขยิ่งล้ำธรรมฮ้อนบ่ฮ่อนมี นอกจากนี้ยังมีคำว่า
กตญฺญุตา ให้ฮู้จักบุญคุณ อย่าได้ลืมไลหลีกเว้น
ชื่อว่าความดีนั้นกตัญญูเป็นเครื่องบอก นอกจากนี้บ่เหลือไว้ให้ส่วนดี ต่อจากนี้มีคำว่าเป็นคาถา
กาเลน ธมฺมสฺสวนํ ให้หายามฟังธรรม ขูดเกาสนิมฮ้าย
ในหัวใจเฮาหมองเศร้า หย่อนว่าเฮาบ่ฉลาด บ่อาจสุขอยู่ล้วน สนิมหุ่มห่อใจเจ้าเอย
เอตมฺมงฺคลมุตฺตมํ อันนี้แหล๋วคือมงคลแท้ แนวอุดมทั้งประเสริฐ
บ่มีไผสิมาส่งให้เสริมให้เฮาได้ดังกล่าวขานพี่น้องเอย....
มีแต่เขามาต้ม ตั่วเอาเงินคนโง่ พาโลหลอกพี่น้อง ได้กินแล้วกะแซวกะแซวหนีซั่นแหล๋ว...
เขาพุ้นตี๋เป็นผู้ได้ ทั้งเสน่ห์ทั้งมงคล ได้ทั้งเงินทั้งทองของขาว แล้วหอบคืนเมือบ้าน
เป็นต๋ะสงสารหน้า อวิชชามาหุ่มห่อไทยเฮานอ ซางมาตั่วหลอกล้อ บ่กลัวหย้านบาปเวรแท้แหล๋ว....
ขนฺติ จ ว่านั้น เพิ่นบอกว่าให้อดทน ทั้งการงานหนักเบาแดดฝนให้ทนกลั้น
ทนทั้งกายใจพร้อมขมเข็มเคียดด่า หวานและส้มให้ชวนชมได้สู่ภายพี่น้องเอย.....
 
โสวจสฺสตา นั้นให้เจ้าเป็นคนเว้าง่าย อย่าได้เฮ็ดอึ่งตึ่งคือหม้อบ่สาง
สมณานญฺจ ทสฺสนํ การได้เห็นได้ใกล้กับท่านผู้มีศีล ผู้สงบกายใจเฮ็ดให้เฮาหายฮ้อน
กาเลน ธมฺมสากจฺฉา นั้น สนทนาในเรื่องดีงามตามโอกาส เฮ็ดให้เฮาฉลาดฮู้ในเรื่องที่กล่าวจา
เอตมฺมงฺคลมุตฺตมํ อันนี้แหล๋วคือมงคลอันประเสริฐ ให้เจ้าจำจื่อไว้ธรรมพระเจ้าสั่งสอนท่านเอย....
อีกอันหนึ่งคาถาว่า ตโป จ ให้เจ้ามีความเพียรแผดเผาอูดรนความฮ้าย
บังคับกายใจพร้อมบ่ตามใจมวลกิเลส อันนี้วิเศษแท้จำไว้อย่าสิลืม
พรฺหมฺจริยญฺจ พร้อม ให้เจ้าประพฤติพรหมจรรย์ ฮู้ควบคุมทางกายระหว่างยามที่ควรเว้น
ทำตนให้เป็นคนผู้ประเสริฐ เฮ็ดจั่งซั่นเขาสิเอิ้นว่าพรหม
อริยสจฺจานทสฺสนํ ความจริงแท้อยู่เหนือผลเหนือเหตุ เห็นแจ่มแจ้งจริงแท้สู่อัน
ฮู้ว่าทุกข์แท้ พร้อมทั้งเหตุของมัน ฮู้อาการของความดับ มอดลงของความฮ้อน
ฮู้จักถอนตนขึ้นตามทางอันประเสริฐ อันนี้เลิศแท้ ๆ จบสิ้นบาปเวร พ่อใหญ่แม่ใหญ่เอย...
นิพฺพานสจฺฉิกิริยา เฮ็ดนิพพานให้แจ้งคือความทุกข์มันดับหาย
อยู่เหนือตายเหนือเป็นบาปเวรจบสิ้น อยู่เหนือดินเหนือฟ้าเหนือดาราน้อยใหญ่
มอดดวงไฟที่ลุกไหม้ในใจเจ้าสิอยู่เย็น บ่แม่นนิพพานเล่น ๆ ที่เขามาหลอกเอาเงิน
ว่าสิพาไปทัวเมืองนิพพาน สู่สถานเมืองแก้ว โอ้ย....แวววาวเหลื่อมตามตายแต่ทางนอก ซอกแซกซอนหนอนน้อยหม่นอยู่ในพ่อใหญ่เอย...

ต่อไปฮั่นเพิ่นเอิ้นว่า ผุฏฺฐสฺส โลกธมฺเมหิ จิตฺตํ ยสฺส น กมฺปติ
บ่มีใจเอี่ยนโอนหวั่นไหว ต่อคำยอหย่อง นินทาพร้อมสรรเสริญกะคือเก่า
บ่มีหมองหม่นเศร้า เสมอด้ามดังแผ่นดิน
อโสกํ ว่านั้นจิตบ่มีโสกี มีแต่ความสงบเย็นอยู่เหนือความเศร้า
วิรชํ พร้อมจิตบ่มอมเกือกขี้ฝุ่น มีแต่ใสจั่งแก้วเบิดแล้วขี้ฝุ่นใจ
เขมํ ซ่ำ จิตอยู่เกษมสรร เบิดปัญหาชีวิตยอดมงคลแท้
ความเพิ่นวาจาต้านขานลงโค้งอ่วย ว่า
เอตาทิสานิ กตฺวา สพฺพตฺถมปราชิตา สพฺพโสตฺถึ คจฺฉนฺติ ตนฺเตสํ มงฺคลมุตฺตมนฺติ .
นรชนพร้อมฝูงหมู่เทวา ให้เฮ็ดนำทำตามที่ว่ามาเบิดเกลี้ยง
ย่อมบ่มีสูญเสี่ยงอัปปราชัยไปทุกที่ ความสวัสดีเที่ยงแท้ มงคลพร้อมทุกสถานอ้ายน้องเอย............

Read more »

ประมวลคำผญาอวยพรแก่บุคคลต่างๆ

 

 

                          คำอวยพรสำหรับข้าราชการชาย
……………………………
ชีวิตต่อแต่นี้ให่มีตั้งแต่ความสุข              อันหมู่มวลความทุกข์ อย่าสิมีมาใกล้
อันหมู่โรคาไข่ หวัดไอให่ไกลห่าง           ได้พบทางก้าวหน่า เจริญขึ่นบ่ถอย
เป็นผู้บ่าวส่ำน้อย ห่าร้อยปีหูยังดีคือเก่า    บ่มีวันแก่เถ่า ผู้สาวหุ่มฮักแพง
ความแข็งแรงคงมั่น บ่มีวันแปรเปลี่ยน      จนเกษียณร้อยครั้ง ยังหนุ่มฟ้อหร่อดังฝัน
อายุยืนยาวมั่นพันปีศรีสง่า                      สุขอยู่ในใต้หล้ามาโฮมเจ้าสู่วัน
นอนหลับนั้นได้เงินพันเงินหมื่น              ตื่นขึ่นได้เงินเต็มห้องทองเต็มบ้าน เด้อ…สาธุ
……………………………
                               คำอวยพรสำหรับข้าราชการหญิง
……………………………
ชีวิตต่อแต่นี้ให่มีตั้งแต่ความสุข                 อันหมู่มวลความทุกข์ ให่ห่างไกลพันลี้
โชคดีให่หลั่งเข่า โภยภัยให่ไกลห่าง          ได้พบทางก้าวหน่า เจริญขึ่นบ่ถอย
เป็นผู้สาวส่ำน้อย ห่าร้อยปีกะยังสวยคือเก่า บ่มีวันแก่เถ่า ผู้บ่าวหุ่มฮักแพง
ความแข็งแรงคงมั่น บ่มีวันแปรเปลี่ยน         จนเกษียณร้อยครั้ง ยังเซ็กซี่สวยดังฝัน
อายุยืนยาวมั่นพันปีศรีสง่า                         สุขอยู่ในใต้หล้ามาโฮมเจ้าสู่วัน
นอนหลับนั้นได้เงินพันเงินหมื่น                ตื่นขึ่นได้เงิน เงิน เงิน และทอง เด้อ…สาธุ
……………………………
                                                  คำอวยพรแวลาผูกแขน
……………………………
ฮ้ายกวาดหนี ฮ้ายกวาดหนี ฮ้ายกวาดหนี         ดีกวาดเข่า ดีกวาดเข่า ดีกวาดเข่า ขวัญเจ้าให่หลั่งโฮม เด้อ
ศรี ศรี ศรี ฝ่ายเส่นนี้ เป็นฝ่ายที่ศักดิ์สิทธิ์          ผูกแขนแล้วสิมีฤทธิ์ฮูงเฮืองไปหน่า
อันหมู่โรคาไข่ หวัดไอบ่มาผ่า                         พบแต่ทางก้าวหน่าเจริญขึ่นดังฝัน
นอนหลับนั้นได้เงินพันเงินหมื่น                      ตื่นขึ่นได้ เงิน เงิน เงิน และทอง
โอม อุ อะ มุ มะ มูลมา สะทา โสตถี ภะวันตุ เต…โอม…. จึก จึก จึก …..เพี้ยง
…………………………… 
                                  

                                               อวยพรผูกแขนเจ้าบ่าว
…………………………..
ฮ้ายกวาดหนี ฮ้ายกวาดหนี ฮ้ายกวาดหนี      ดีกวาดเข่า ดีกวาดเข่า ดีกวาดเข่า ขวัญเจ้าหลั่งมาโฮม เด้อ
ศรี ศรี ศรี สิทธิพระพร บวรล้ำาเลิศ ฝ้ายแก้วเกิดเมืองสวรรค์   ปันลงมาให่ผู่ข่าผูกแขนเจ้าบ่าว เพิ่นได้แต่งงานกับเจ้าสาวในมื้อน้ี
มาเยอขวัญเอย ขวัญเจ้ามาฮอดแล้วให่เจ้าอยู่สวัสดี   มีสุขภาพดีแข็งแรง พ่อเถ่าแม่เถ่าฮักแพงคือลูกคือหลาน
พี่น้องบริวารฮักแพงแห่ล้อม เมียอ่อนน้อมเอาอ้กเอาใจ   ได้ลูกชายหญิงดังที่เจ้าปรารถนา การงานให่ก้าวหน่า
การค้าให้ฮูงเฮือง การเมืองให่ลือลั่น การบ้านให่ขยัน    ผิวพรรณให่ผ่องใส ให้เจ้าฮ่างเจ้ามี ให่เจ้าได้เป็นเศรษฐี
เป็นมหาเศรษฐี เป็นลูกเขยที่ดี เป็นผัวที่ดี เป็นพ่อที่ดี เด้อ  ปสิทธิ เตโช ปสิทธิ มังคะโล มหาชัยโย…. เพี้ยง
……………………….
                                                  คำอวยพรผูกแขนเจ้าสาว
…………………………..
ฮ้ายกวาดหนี ฮ้ายกวาดหนี ฮ้ายกวาดหนี         ดีกวาดเข่า ดีกวาดเข่า ดีกวาดเข่า ขวัญเจ้าให่หลั่งโฮม เด้อ
ศรี ศรี ศรี สิทธิพระพร บวรล้ำาเลิศ ฝ้ายแก้วเกิดเมืองสวรรค์ ปันลงมาให่ผู่ข่าผูกแขนเจ้าสาวในมื้อนี้วันนี้
มาเยอขวัญเอย ขวัญเจ้ามาฮอดแล้วให่เจ้าอยู่สวัสดี   มีสุขภาพดีแข็งแรง ปู่ย่าฮักแพงคือลูกคือหลาน
พี่น้องบริวารฮักแพงแห่ล้อม ผัวอ่อนน้อมเอาอ้กเอาใจ  ได้ลูกชายหญิงดังที่เจ้าปรารถนา การงานให่ก้าวหน่า
การค้าให้เจริญ การเงินให่ลือลั่น การบ้านให่ซอยกัน  ผิวพรรณให่ผ่องใส ให้เจ้าฮ่างเจ้ามี เป็นลูกสะใภ้ที่ดีของปู่ย่า
เป็นที่เพิงพาของพี่น้อง ป้า ลุง ลูก หลานสู่คน เด้อ  จัตตาโร ธัมมา วัฒทันติ อายุ วัณโณ สุขัง พะลัง…. เพี้ยง
…………………………….
                                          คำอวยพรผูกแขนลูกหลาน
………………………………
ฮ้ายกวาดหนี ฮ้ายกวาดหนี ฮ้ายกวาดหนี    ดีกวาดเข่า ดีกวาดเข่า ดีกวาดเข่า ขวัญเจ้าให่หลั่งโฮม เด้อ
ศรี ศรี ศรี สิทธิพระพร บวรล้ำาเลิศ ฝ้ายแก้วเกิดเมืองสวรรค์  ปันลงมาให่ผู่ข่าผูกแขนหลานในมื้อนี้วันนี้
มาเยอขวัญเอย ขวัญเจ้ามาฮอดแล้วให่เจ้าอยู่สวัสดี       มีสุขภาพดีแข็งแรง พ่อแม่ฮักแพงหลายบ่น้อย
พี่น้องซอยส่งเสริม การงานให่ก้าวหน้า        การศึกษาให่เฮืองฮูง ได้เกรดสูงสี่ล้วนดังที่เจ้าปรารถนา
ให้เจ้ามีอายุยืนยาว ผิวพรรณขาวอ่องต่อง     งามผุดผ่องส่องใส ไผเห็นกะฮักกะแพง
ให่เจ้าแข็งแรงบ่เจ็บบ่ไข้ พ่อแม่พี่น้องได้เพิงพา    จัตตาโร ธัมมา วัฒทันติ อายุ วัณโณ สุขัง พะลัง
โอม สะวาหิ โอม สะวาหะ โอม ตุ ตะ ตุ ตะ ..เพี้ยง
……………………………..
                                                คำอวยพรผูกแขนผู้สูงอายุชาย
………………………………
ฮ้ายกวาดหนี ฮ้ายกวาดหนี ฮ้ายกวาดหนี    ดีกวาดเข่า ดีกวาดเข่า ดีกวาดเข่า ขวัญเจ้าให่หลั่งโฮม เด้อ
ศรี ศรี ศรี สิทธิพระพร บวรล้ำาเลิศ ฝ้ายแก้วเกิดเมืองสวรรค์  ปันลงมาให่ข่อยผูกแขนพ่อใหญ่……ในมื้อนี้วันนี้
มาเยอขวัญเอย ขวัญเจ้ามาฮอดแล้วให่เจ้าอยู่ดีมีแฮง    นอนหลับได้เงินพัน นอนฝันได้เงินหมื่น
นอนตื่นได้เงินแสน แบนมือไปได้เงินล้าน                    ออกนอกบ้าน พ้อห่องอาหารรีสอร์ต
มีผู้สาวมาหุ่มกอด ไปนวดหลังนวดแอว                         ให่ม่วนซื่นโฮแซว บ่แก่บ่เถ่า
อยู่เป็นเจ้าโคตรหมู่วงศา                                             สมปรารถนาทุกสิ่งทุกประการ เด้อ
จัตตาโร ธัมมา วัฒทันติ อายุ วัณโณ สุขัง พะลัง
……………………………………
                                      คำอวยพรผูกแขนผู้สูงอายุหญิง
…………………………………..
ฮ้ายกวาดหนี ฮ้ายกวาดหนี ฮ้ายกวาดหนี         ดีกวาดเข่า ดีกวาดเข่า ดีกวาดเข่า ขวัญเจ้าให่หลั่งโฮม เด้อ
ศรี ศรี ศรี สิทธิพระพร บวรล้ำาเลิศ ฝ้ายแก้วเกิดเมืองสวรรค์ปันลงมาให่ข่อยผูกแขนแม่ใหญ่…ในมื้อนี้วันนี้
มาเยอขวัญเอย ขวัญเจ้ามาฮอดแล้วให่เจ้าอยู่ดีมีแฮง    นอนหลับได้เงินพัน นอนฝันได้เงินหมื่น
นอนตื่นได้เงินแสน แบนมือไปได้เงินล้าน        ออกนอกบ้านได้ไปวัดไปวา
ลูกหลานพาไปไหว้พระธาตุอาจารย์                 ให่เจ้าสุขสำราญแข็งแรงบ่แก่บ่เถ่า
อยู่เป็นเจ้าโคตรหมู่วงศา                                 สมปรารถนาทุกสิ่งทุกประการ เด้อ
จัตตาโร ธัมมา วัฒทันติ อายุ วัณโณ สุขัง พะลัง
……………………… 
                              

                                              อวยพรวันเกิด
…………………….
มื้อนี้วันเกิดเจ้า เอาพรชัยมาส่ง                  ประสงค์ใดขอให่ได้ สมด้ามดั่งหมาย
คันเจ้าคึดอยากได้ สรรพสิ่งเงินทอง           ให่หลั่งไหลมากอง เต็มห่องเฮือนของเจ้า
โชคดีให่หลั่งเข่า โพยภัยให่ไกลห่าง          พบแต่ทางก้าวหน่า นำพาเจ้าสุขสำบาย
อันหมู่โรคาไข่ หวัดไอไข่บ่สวง                  ปวดแข้งขาเจ็บส่วง ให่หายสิ้นสู่อัน
อายุยืนยาวมั่น สุขสำราญการเป็นอยู่           สมประสงค์สู่ด้าน ให่ฝันเจ้าเป็นความจริง เด้อ สาธุ
………………………………………………………….
                              อวยพรลา (ตลกโปกฮาคลายเครียดตอนเลิกอบรม)
…………………………………………………………
ขอลาเด้อทุกท่าน อาจารย์ใหญ่ ผอ.            ผู้มารอนั่งอบรม อยู่นำกันหลายวันแล้ว
ขอลาแนวซุมเชื้อ วิทยากรคนสวย/หร่อ        คงสิได้พบพ้อ กันแท้แน่นอน
หำยังแขวนอ้อนต้อน ขายังย่างไปเป็น         เอ็นยังแข็งคึกคัก แอวยังดีพอได้เด้า
สิบ่เซาทางสร่าง การศึกษาให่เฮืองฮูง ดอกนา   ความฮู้ได้เทือนี้ นำไปใช้ได้แน่นอน
จึงขออวยพรให่ ไชยโยสิทธิโชค                ถืกโฉลกทุกเรื่อง ภัยฮ้ายเจ้าอย่ามี
ให่เจ้าสุขีหมั่น เสมอมันเคือเก่า                   ผู้เถ่าเถ่าถ่าอยู่บ้าน ให่ของขึ่นจนออกแสง
เมือมื้อแลงให่เจ้าได้ เบิกถอยหลังฮอดสามสี่  โชคดีขี่ถืกหม่อง เงินทองลันหลั่งโฮม เด้อ สาธุ
………………………….
                                       อวยพรลางานบุญผ้าป่า
………………………..
ขอลาเด้อทุกท่าน ที่มางานบุญผ่าป่า         เทือมีงานปีหน่า จั่งมาพ้อพบกัน
ขอบพระคุณทุกท่าน ที่ดูแลเอาใจใส่           แนวใดแซบหาให่ ใจหมู่เจ้าจั่งแม่นดี
คันมีใจให่กันแล้ว แจ่วเกลือกะอร่อย            แม่นว่ามีลาบก้อย ซังแล้วบ่อยากเหลียว
ข้อยสิเทียวหาหมู่เจ้า เอาผ้าป่ามานำ          มาทำบุญนำกัน ผูกพันเป็นพี่น้อง
มาเป็นทองผืนแหน่น แผ่นเดียวกันหมั่นแก่น แม่นจากไปมื้อนี้ ปีหน่าสิต่าวมา
เถิงเวลาจากกันแล้ว ขออวยพรแถมส่ง         ประสงค์ใด๋ขอให่ได้ สมด้ามดังหมาย
ผู้ใดฮูปฮ่างฮ้าย ให่ส่วยหร่อละออตา            โชคลาภไหลหลั่งมา สู่วันบ่มีเว้น
ให่เจ้ามีเป็นได้ สมตั้งใจทุกสิ่งอย่าง             ผู้ที่เป็นหม่ายฮ้าง ได้แฟนฮู้ฮักจริง
ซุมบ่าวสาวใสซิ่ง ได้แฟนจริงสวยหร่อ         ซุมพ่อแม่พี่น้อง มีคู่แล้วให่หมั่นยืน
นอนหลับนั้น ได้เงินพันเงินหมื่น                 ตื่นขึ่นได้ เงิน เงิน เงิน และ เงิน เด้อ สาธุ
………………………..
                                            อวยพรให้คณะผ้าป่า

ขอบพระคุณทุกท่าน ที่มางานบุญผ่าป่า              อย่าลืมสัญญาที่ให่ไว้ ว่าปีหน่าเจ้าสิมา
ข่อยสิหาแนวกินไว้ มวลปูปลาปิ้งป่น                  แนวใดแซบขนมาไว้ แม่นไกลใกล้สิซอกหา
คันบ่ได้เห็นหน่า เจ้าบ่มาคือดังว่า                      ข่อยสินอนนั่งถ่า วิงวอนฟ้าให่หล่ำแยง
น้องคำแพงเอื้อยอ้าย ให่เมือดีอย่าลำบาก           ความทุกข์ยากอย่าสิใกล้ โพยภัยให่ห่างไกล
อันหมู่โรคาไข่ หวัดไอให่ไกลห่าง                       ทางชีวิตข่างหน่า ให่พานพ้อสุขสำบาย
โชคลาภให่ ไหลหลั่งมาโฮม                              สมกับความตั้งใจ สู่อันคือฝันเจ้า
ซุมบ่าวสาวได้แฟนฮู้ ฮักแพงบ่แหนงหน่าย           ผู้ที่เป็นหม่ายฮ้าง ได้แฟนฮู้ฮักจริง
มีคู่อิงแอบแล้ว ให่หมั่นยืนยาวยิ่ง                        สิ่งใดดีให่หลั่งเข้า สิ่งใดฮ้ายให่หลั่งหนี
ให่เจ้ามีเป็นได้ สมตั้งใจเจ้าสู่อย่าง                     เห็นทางมาวัดบ้านข่อย มาซอยสร้างอย่าสิลืม เด้อ

 

ข่าขอนบนอบไหว่ ประธานใหญ่ในงาน                  สุขสำราญสู่คน ที่สนใจมางานนี้

วันที่มีงานเลี้ยง สังสรรค์วันงานแต่ง                     น้องคำแพงฮักกันมั่น พัวพันไว้ด้วยฮักหลาย

ขอแสดงความดีใจด้วย เจ้าสาวสวยเจ้าบ่าวหล่อ     เหมาะสมกันกะด้อ ซ่างหาพ้อกะซ่างเป็น

ข่อยอยากเห็นหมู่เจ้า มีลูกหลานหลานเหลนหล่อน    ข่อยออนซอนล่วงหน่า ว่าลูกเจ้าต้องหล่อสวย

จึงขออวยพรให่ ได้มีเป็นทุกสิ่งอย่าง                       ตามที่หวังวาดไว้ สมใจเจ้าใฝ่ฝัน

มีลูกหลานไวฟ้าว เป็นบ่าวสาวเจ้าได้เพิง                ไทยบ้านได้ยอย่อง มวลพี่น้องได้เพิงพา

ให่เจ้ามีอายุมั่น ขวัญยืนยาวยิ่ง                               สิ่งใดดีใหลั่งเข่า สิ่งใดฮ้ายให่หลั่งหนี

เป็นเศรษฐีพันล้าน การงานให่ลุหลั่ง                      ย่างไปใสไทยบ้านหุ่ม แห่แหนเจ้าด้วยฮักแพง

ความแข็งแฮงคงมั่น บ่มีวันแปรเปลี่ยน                   ผิวนวนเนียนปานยังน้อย มีข่อยข่าซอยแฮง

ฮักแพงฮอดมื้อเฒ่า ดูแลกันฮอดมื้อแก่                   เป็นแม่ตู้พ่อตู้ ชูไม้เท้าซอยเดิน พุ้นหละเด้อ

 

ขอบพระคุณทุกท่าน ที่มางานบุญผ่าป่า                 อย่าลืมสัญญาที่ให่ไว้ ว่าปีหน่าเจ้าสิมา

ข่อยสิหาแนวกินไว้ มวลปูปลาปิ้งป่น                     แนวใดแซบขนมาไว้ แม่นไกลใกล้สิซอกหา

คันบ่ได้เห็นหน่า เจ้าบ่มาคือดังว่า                        ข่อยสินอนนั่งถ่า วิงวอนฟ้าให่หล่ำแยง

น้องคำแพงเอื้อยอ้าย ให่เมือดีอย่าลำบาก              ความทุกข์ยากอย่าสิใกล้ โพยภัยให่ห่างไกล

อันหมู่โรคาไข่ หวัดไอให่ไกลห่าง                         ทางชีวิตข่างหน่า ให่พานพ้อสุขสำบาย

โชคลาภให่ ไหลหลั่งมาโฮม                                สมกับความตั้งใจ สู่อันคือฝันเจ้า

ซุมบ่าวสาวได้แฟนฮู้ ฮักแพงบ่แหนงหน่าย            ผู้ที่เป็นหม่ายฮ้าง ได้แฟนฮู้ฮักจริง

มีคู่อิงแอบแล้ว ให่หมั่นยืนยาวยิ่ง                         สิ่งใดดีให่หลั่งเข้า สิ่งใดฮ้ายให่หลั่งหนี

ให่เจ้ามีเป็นได้ สมตั้งใจเจ้าสู่อย่าง                     เห็นทางมาวัดบ้านข่อย มาซอยสร้างอย่าสิลืม เด้อ

 

                                               คำอวยพรในวันเกิด
มื้อนี้วันเกิดเจ้า เอาพรชัยมาส่ง                      ประสงค์ใดขอให่ได้ สมด้ามดั่งหมาย

คันเจ้าคึดอยากได้ สรรพสิ่งเงินทอง               ให่หลั่งไหลมากอง เต็มห่องเฮือนของเจ้า

โชคดีให่หลั่งเข่า โพยภัยให่ไกลห่าง               พบแต่ทางก้าวหน่า นำพาเจ้าสุขสำบาย

อันหมู่โรคาไข่ หวัดไอไข่บ่สวง                        ปวดแข้งขาเจ็บส่วง ให่หายสิ้นสู่อัน

อายุยืนยาวมั่น สุขสำราญการเป็นอยู่                สมประสงค์สู่ด้าน ให่ฝันเจ้าเป็นความจริง เด้อ สาธุ

                             

                                             ผูกแขนหลาน

มา มา มา ให้เจ๊าหยับเข้ามาใกล้                    ใหญ่นะโมสิ๊ผูกแขน......พะนะ

ฮ้ายกวาดหนี ฮ้ายกวาดหนี ฮ้ายกวาดหนี        ดีกวาดเข่า ดีกวาดเข่า ดีกวาดเข่า ขวัญเจ้าให่หลั่งโฮม เด้อ

ศรี ศรี ศรี สิทธิพระพร บวรล้ำาเลิศ                ฝ้ายแก้วเกิดเมืองสวรรค์

ปันลงมาให่ผู่ข่าผูกแขนหลานในมื้อนี้วันนี้       มาเยอขวัญเอย ขวัญเจ้ามาฮอดแล้วให่เจ้าอยู่สวัสดี

มีสุขภาพดีแข็งแรง พ่อแม่ฮักแพงหลายบ่น้อย   พี่น้องซอยส่งเสริม การงานให่ก้าวหน้า

การศึกษาให่เฮืองฮูง                                     ได้เกรดสูงสี่ล้วนดังที่เจ้าปรารถนา

ให้เจ้ามีอายุยืนยาว ผิวพรรณขาวอ่องต่อง         งามผุดผ่องส่องใส ไผเห็นกะฮักกะแพง

ให่เจ้าแข็งแรงบ่เจ็บบ่ไข้ พ่อแม่พี่น้องได้เพิงพา   จัตตาโร ธัมมา วัฒทันติ อายุ วัณโณ สุขัง พะลัง

โอม สะวาหิ โอม สะวาหะ โอม ตุ ตะ ตุ ตะ ..เพี้ยง

                                                         อวยพรบ่าวสาว

มีเจ้าบ่าว กะต้องมีเจ้าสาว เอ๊าหยั๊บเข่ามา........ พี่น้อง...มาเด้อข๊วนเอ๊ยย

ฮ้ายกวาดหนี ฮ้ายกวาดหนี ฮ้ายกวาดหนี          ดีกวาดเข่าดีกวาดเข่า ดีกวาดเข่า ขวัญเจ้าให่หลั่งโฮม เด้อ

ศรี ศรี ศรี สิทธิพระพร บวรล้ำเลิศ ฝ้ายแก้วเกิดเมืองสวรรค์  ปันลงมาให่ผู่ข่าผูกแขนเจ้าสาวในมื้อนี้วันนี้

มาเยอขวัญเอย ขวัญเจ้ามาฮอดแล้วให่เจ้าอยู่สวัสดี    มีสุขภาพดีแข็งแรง ปู่ย่าฮักแพงคือลูกคือหลาน

พี่น้องบริวารฮักแพงแห่ล้อม ผัวอ่อนน้อมเอาอ้กเอาใจ  ได้ลูกชายหญิงดังที่เจ้าปรารถนา การงานให่ก้าวหน่า

การค้าให้เจริญ การเงินให่ลือลั่น การบ้านให่ซอยกัน  ผิวพรรณให่ผ่องใส ให้เจ้าฮ่างเจ้ามี เป็นลูกสะใภ้ที่ดีของปู่ย่า

เป็นที่เพิงพาของพี่น้อง ป้า ลุง ลูก หลานสู่คน เด้อ   จัตตาโร ธัมมา วัฒทันติ อายุ วัณโณ สุขัง พะลัง…. 

ฮ้ายกวาดหนี ฮ้ายกวาดหนี ฮ้ายกวาดหนี                 ดีกวาดเข่า ดีกวาดเข่า ดีกวาดเข่า ขวัญเจ้าหลั่งมาโฮม เด้อ

ศรี ศรี ศรี สิทธิพระพร บวรล้ำาเลิศ ฝ้ายแก้วเกิดเมืองสวรรค์    ปันลงมาให่ผู่ข่าผูกแขนเจ้าบ่าว เพิ่นได้แต่งงานกับเจ้าสาวในมื้อน้ี

มาเยอขวัญเอย ขวัญเจ้ามาฮอดแล้วให่เจ้าอยู่สวัสดี    มีสุขภาพดีแข็งแรง พ่อเถ่าแม่เถ่าฮักแพงคือลูกคือหลาน

พี่น้องบริวารฮักแพงแห่ล้อม เมียอ่อนน้อมเอาอ้กเอาใจ   ได้ลูกชายหญิงดังที่เจ้าปรารถนา การงานให่ก้าวหน่า

การค้าให้ฮูงเฮือง การเมืองให่ลือลั่น การบ้านให่ขยัน     ผิวพรรณให่ผ่องใส ให้เจ้าฮ่างเจ้ามี ให่เจ้าได้เป็นเศรษฐี

เป็นมหาเศรษฐี เป็นลูกเขยที่ดี เป็นผัวที่ดี เป็นพ่อที่ดี เด้อ    ปสิทธิ เตโช ปสิทธิ มังคะโล มหาชัยโย…. เพี้ยง

                                                            ปีใหม่
ปีเก่าเมิดไปแล้ว ปีใหม่ได้มาเถิง                                ขอพระอินทร์ผู้อยู่เทิง ดาวดึงส์เมืองฟ้า

ประทานพรลงมาให่ มนุษย์ในพื้นแผ่น                         ทั่วดินแดนโลกกว้าง ให่เนายั้งอยู่ดี

อย่าได้มีเหตุฮ้อน สรรพสิ่งอันใด                                โพยภัยหาย อย่าสิหวนเห็นพ้อ

ผู้ที่รอโชคเข่า วาสนาเสริมส่ง                                    สมประสงค์สู่ด้าน งานเงินพร้อมสู่อัน

ผู้ขี่คร้าน ให้พออยู่พอกิน                                          ผู้มีศีลมีธรรม ให่ฮ่างมีดีได้

ผู้ที่เจ็บป่วยไข่ ให่หายดีมีสุขยิ่ง                                สิ่งใดดีหลั่งเข่า โพยภัยฮ้ายให่ห่างไกล

ทุกคนมีเป็นได้ สมตั้งใจทุกสิ่งอย่าง                          ทางชีวิตปีใหม่นี้ สุขขีมั่นสู่คน เด้อ สาธุ

ปีใหม่นี่ ให่มันดี/กว่าปีเก่า                      เงินเข่าเฮือนมื้อละร้อย ปีใหม่ได้/มื้อละพัน

ฝันปีเก่านั้น ฝันบ่ดี/มีแต่ล่าย                   ฝันปีใหม่/ให่เห็นโตก้องย่อง ซื้อได้โลด/บ่ต้องแปล

แก่ปีเก่านั้น ปีใหม่ให่/เป็นบ่าวสาว            เมียเฮาเคยเป็นยักษ์ ปีใหม่กลาย/เป็นนางฟ้า

ผัวขี่ยาขี่เหล่า ให่เซากินเซาดื่ม              เคยยืมเงินผู้อื่นใช้ ปีใหม่ให่/เป็นเจ้ามือ

เมียให้ถือเงินได้ บ่เกินวัน/ละซาวบาท      ปีใหม่เมียให่เพิ่ม ยี่สิบบาท/บ่ต้องทอน เด้อ สาธุ ประหยัดซ่อยกัน

                                                ผญาอวยพร

ผญาอวยพร......เด้อพี่น้องให้เจ้าสุขอยู่ล้น ผลที่ก่อกรรมดี ให้อยู่แดงมีฮี ให้อยู่ดีมีแฮง บ่เปลี่ยนแปลงสุขนั้น อายุยืนยาวมั่น พันปีอย่าได้หล่า..มีเดชาเกียรติก้อง ให้คนย่องกล่าวขาม มีแต่หัวย่ามๆนามยศปรากฎไกล สุขสดใสบ่มีเหงา กว่าคนเขาทั้งค่าย พ้อแต่ดีบ่มีฮ้าย มาทำลายให้ม้างมุ่น ความเจ็บเป็นเอ็นอุ่น อย่าสิมีท่อกิ้น ให้หายสิ้น แก่ท่านเด้อ...

Read more »

คำผญาจีบสาว

คึดฮอดน้องหลาย..ยามเดือนหงายได้แนมเบิ่ง
ขึ้นเทิงกกบักโกแล้ว..กะบ่มีคลื่นแหม่นได้โทร
อยากฮัลโหลไปเว้า..แต่ถึงคราวหัวลมป่วน
อยากมีหมู่หม่วนเว้า..บัดทางบ้านคลื่นบ่มี
เป็นจั่งซี้ตั่วหละเจ้า..บ้านของเฮานอบ้านถ่ง
พกมือถือไปเกี่ยวเข้า..แต่คนเว้าหักบ่มี
พอสิมีผัดบ่เว้า..บาดยามเฮาปีนกกก่อง
ย้อนอยากเว้ากับอี่น้องจั่งโสขึ้นดอกป่ายปีน
บ่ได้ยินอีหลีเบ๊าะ..หรือหว่าคุยกับทางอื่น
อ้ายหนิทนข่มขื่น..ย้อนหว่าฝืนขึ้นต้นไม้หาคลื่นกะบ่เจอ.
นางเอ้ย..นางมาลืมกะแล่มจ้อย.อ้ายคอยจนหว่าเปื่อย..วันเวลาผ่านไปเรื่อย.ไอติมนั้นเผิ่นบ่กิน..หันไปกินของทางพู้น.ลืมแล้วบ่ไอติมแถ่ง..น้องเคยแบ่งกินกับอ้าย.คราวกี้แต่เยาว์..โอ้นอสาวคราวกี้.ของหวานนั้นหมากเล็บแมว..ลืมแล้วบ้อหมากเหม่า.เฮาเคยกินจนลิ้นด่าง..อ้ายกับนางยังเคยเว้าตอนขุดเบ้าอยู่เลาะโพน
ยังเคยโตนน้ำเหล่นจนตาเว็นเบิดแสงส่อง..หย่างนำทางเสียงเขียดฮ้องมีสุขแท้ตั้งแต่หลัง..บาดนี้นอลาเฮือนบ้าน.หนีอีสานมากรุงใหญ่..ทำงานอยู่หม่องใด๋.ส่งควมไปกะบ่พ้อ.อ้ายรอน้องสิต่าวคืน..เจ้าเอ้ย..
ฝนตกรินไหลย้อย..อ้ายคอยนางใจวอนหวี่..จนหว่าเบิดเดือนสี่..เดือนห้ามาแล้วเด้อน้อง..อ้ายคองถ่าเจ้าแต่เหิง..เหลียวไปทางแก่วก้ำ..เขาใหญ่เมืองภูพาน..คึดฮอดเด้ตาหวานบ่าวผี่ชายเคยวอนเว้า..เจ้ามาไรลืมอ้ายบ่าวภูไทเสียงเหน่อๆ..หรือหว่าเธอบ่คึดง้อคราวกี้แต่หลัง..หรือหว่านางใจเลี้ยวเกี้ยวชายนอคนใหม่..ปล่อยให้ชายถ่าพ้อว้อ..โอ้ยนอเจ้าดอกส่างเป็น..
คันเจ้าไรลืมลืมเลี้ยว..ปั้นเข้าเหนียวเคยจ้ำป่น
หรือลืมคนจั่งอ้ายแล้ว..ทางยายเถ่าเจ้าอย่าลืม
ฮอดยามใด๋ฟ้ามืดคลึ้ม....ยังบ่ลืมคำแหม่หว่า
ฟ้าวกินปลากินเข้า..หัวลมหย่าวไฟสิดับ
คือสิดับ..แสงเฮืองๆขี้กระบองนออันน้อย
คันหว่าไรลืมข่อย..อย่าสุลืมคนชูส่ง..เด้อนาง
ยามฝนลงแล้วคล้อย..ยายเฝ้าคอยแนมทางต่าว
หวังสิเห็นโตเจ้า..เลาหนั่งเศร้าห่าฝนซา..
ฝากบอกสาวให้คืนบ้าน..อ่วยต่าวแหน่เด้อนาง
ผู่เผิ่นคอย..ควมเผิ่นหวัง..อยากเห็นนางอ่วยมาบ้าน..

            โอ้ยน้อ...นางเอ้ย
บุญกุศลสร้างได้ฮ่วมทางดอกจั่งหว่า
คงเป็นตาชื่นมื่นทุกคืนเช้าเจ้าหว่าใด๋
คันเจ้าไรลืมทิ่มคงขึ้นหนิมให้เขาส่า
เป็นคือจั่งมีดพร้าคันฝนได้กะบ่คม....สั้นแหล่ว..น้องสาวหล่าเอ้ย
หวังอันใด๋กะเพม้างบ่สมหวังดอกจักเถื่อ
เหลือแต่ใจนอฮ้างๆอดสาส่างหย่างเทียว
เหลียวทางใด๋กะมืดครึ้มอึมครึมหนทางหย่าง
ทางที่มีกะมาฮ้างๆหนทางน้อยจั่งข่อยเดิน..สั้นแหล่ว

เป็นจั่งใด๋น้อน้องสาวหล่า.....สุขซมบายดีบ่อ
หรือเจ้าเจ็บป่วยไข้..............ฮมฮ้อนทั่วคิง
คือบ่อแวมาเข้า..................เวปบ้านดอนเรดิโอจักเที่อ นางเอ๋ย
หรือว่าน้องหล่า...................นอนหลับไปแล้วหนอ คำแพงเอ๋ย
บ่ได้มาสองสามมื้อคือจั่งหว่านอเป็นปีสันบ๋อ
ครั้นสิจากไปแรมเดือนใจผี่ซายคงอุกเอ้า..
เจ้าอย่าไรลืมเลี้ยวทางเทียวที่เคยหย่าง..
ใจผี่ซายคงอ้างว้างคันนางน้อยบ่หว่าจา..
แนวคำจายังบ่คล่องตามครรรองน้องส่อยเบิ่ง
ไปเหิงเหิงหากสิฮู้หว่าซายนั้นเฝ้าเบิ่งแยง..อยู่เด๊ะ..

น้องเอ้ย..
ถ่านไฟเก่าเจ้ายังฮ้อนมันบ่มอนดอกคือหว่า..
อย่าสุจาหลาบหล่ายหมายเว้าต่อผี่ซายดอกเด้..
คันหว่าเซถลาล้มไผบ่โซมอ้ายสิเบิ่งเอาดอกนา..
ไผบ่แยงบ่จาอ้ายนี่นาผัดคอยเว้านำเจ้าดอกอยู่เด้..
บ่ได้เป๋แปรปลิ้นดอกเด้นางอ้ายฮู้ส่าว..
แต่บางคราวบ่อยากเว้าซอมเบิ่งเจ้าอยู่แต่เหิง..
เบิ่งเหิงเหิงบ่คือเว้าใจเฮาบ่คือหว่า..
บ่เป็นหยังดอกน้องหล่าญาอ้ายดอกส่างเป็น..
บ่อยากเป็นแนวนี้ย้อนหวังดีเบิดถู่อย่าง..
บ่เคยคิดหมุ่นม้างเป็นใด๋นั้นบ่หว่านาง..
กะสิคอยเบิ่งเจ้าอันใด๋ดีสิชูส่งสั้นแหล่ว..
ย้อนหวังดีบ่หวังได้บัดใจนั้นผัดส่างเป็น..
เฮ็ดจั่งใด๋นอใจข่อยมันสำออยบ่คือหว่า..
เบิ่งกายากะบ่น้อยบัดใจนั้นผัดจ่อยผอม..


ผู้สาวนั่งเข็นฝ้าย ........ชายกะนั่งเคียงกัน
พรรณนาคำกลอน ......เกี้ยวคำผญาเว้า
สาวกะเอาคำโต้ .........โยเยให้ฮู้ท่า
ส่วนว่าบาบ่าวท้าว .......กะเพียรเว้าว่าฮักหลาย
สาวกะบอกว่าอ้าย ......อย่าสิหล่ายแต่คำตั๋ว
น้องนี่กลัวคำลวง .........อย่าล่วงวาจาดื้อ
คันบ่คือคำเว้า ........... อย่าสิเอามาเว้าว่า
สิมาต้มผู้ข้า ..............ปะเดี๋ยวฟ้าสิผ่าเอา....สาเด๋
บัดนี่ชายกะเว้า ......... เอามือยกสาบาน
ขานเป็นวาจาไข .........ว่าดั่งใจคำเว้า
คันข้าเอาคำต้ม ..........เป็นคารมย์เว้าหล่าย...สาแหล๋ว
ขอให้ฟ้าผ่าอ้าย ............ ให้ตายแท้ขั่นบ่จริง
สาวกะนั่งเงียบนิ่ง .........ครุ่นคิดอยู่ในใจ
แล้วจั่งไขวาจา ..........ตอบบาพี่ชายท้าว
อ้ายสิเอาจริงแท้ ..........บ่มีแปลซั่นบ้อพี่
คันคิดดีแท้แท้ ............ให้ถามแม่เบิ่งก่อนนา
ตกลงกันแล้วน่า .........กะจั่งว่าได้มาขอ
กะจั่งขอยอยก ...........ขันหมากมาเพียงพร้อม
จั่งได้ดอมชมชื่น ..........เข้าพาขวัญป้อนไข่หน่วย
นี่จั่งสมครบด้วย ..........บทเบื้องสิแต่งงาน ...นี่แหล่ว
นี่จั่งแม่นแบบบ้าน ..........ของเก่าโบราณเดิม
เติมขึ้นมาทีหลัง ............หากบ่คือแนวนี่
อันแนวดีมันเบิดสิ้น ........มีแต่กินแล้วจั่งแต่ง
สาวกะห่าวแข้งแข้ง ......... แซงหน้าบ่ว่ากัน ฯ...เหอะ ๆ...


สิเว้าไปตามส่าว............ใจผู่สาวบ่คือหว่า
แฮ่งใจเฮากะผ่องนั้น.......บ่ทันฮู้หากบ่เจอ
คิดไปไกลใจเพ้อ...ละเมอไปเกือบหลงส่าว
ย้อนคิดนำผู่สาว..........ผัดโตเองบ่คิดย้อน
หลงนอนเพ้อ........โอ้ย!โตข่อยดอกส่างเป็น

อย่าสุลืมเด้อหล่าวันสงกรานต์ไกล้มาอ้ายยังถ่าสิพ้อพบ
ไกล้สิจบหละไป่นอน้องอ้ายครองถ่าสิพบเจอ
ไปเฮียนไกลต่างบ้านจากไปนานอ้ายฮอนฮ่ำ
อ้ายคึดนำแต่อี่น้องเฮียนจบแล้วอย่าสุลืม
เงินที่ยืมเขามานั้นส่งไป..ใช้พอบ่
อย่าลืมเด้ออี่น้องคนกู้ให้นั้นแหม่นไผ
ถึงสิทุกข์ยากฮ้ายเฮ็ดจั่งใด๋อยากพ้นทุกข์
จั่งได้มุมาดม้างยืมตังค์ให้ส่งเจ้าเฮียน
อ้ายบ่มีดอกเด้อหล่าปริญญาสิมาข่อง
มีแต่โตหล่องข่องกับใจน้อยค่อยก้าวเดิน
หวังมีเงินมีบ้านจั่งสู่งานอยู่เช้าข่ำ
เอาแฮงกายเข้าแลกเดินสู่ดอกส่าวไป
ฮอดยามใด๋คิดท้อยังคอยรอแฮงใจอยู่
จักผู่ใด๋สิฮู้แท้ในใจนั้นอ้ายส่างเหงา..แท้เด้
บ่เคยเคยคิดอุกเอ้าบ่เคยเหงาย้อนงานหย่าว
หวังเพียงแต่มื้ออื่นเช้าสิได้พ้อหม่อมพะนาง..

คือส่างมาเฮ็ดตาส้มหลับตาชังใส่ญาผี่
บาดมาหาผัดแหล่นลี้เฮ็ดจั่งซี้สิคิดใด๋
ย้อนเดาใจน้องบ่ออกรึมารยาเต็มกระต่า
คือจั่งเผิ่นหว่าไว้เอาเกวียนร้อยใส่บ่พอ
เฮ็ดจั่งใด๋หละนออ้ายอันซายพึ่งหัดใหม่
อยากสิฮู้ใจ..ใสแจ้งอันควมแท้อยู่ใน..
เผิ่นหว่าใจคนนั้นคือเถาวัลย์พันเกี่ยว..สั้นบ้อ
คันบ่เหลียวกะบ่เว้าขอซอมเจ้าเบิ่งเอา
ทั้งที่ปากบอกไม่แต่ทางใจผัดคึดต่าง
ส่างสิเป็นคือเผิ่นเว้าสั้นตี้น้องแต่ก่อนเหิง
เบิ่งภายนอกนอสวยเช้งข้างในเจ้าสิจั่งใด๋
เป็นจั่งใด๋ให้ลองเว้าเป็นแนวใด๋กะลองกล่าว
อดสาสอนผู้บ่าวน้อยให้เฮียนฮู่แหน่เป็นหยัง
ย้านเป็นคือจั่งควมเขาเว้าสิลองฮักจักกี่หน..สั้นบ้อ
อ้ายบ่เอาดอกเด้อนางขอเถื่อเดียวกะพอแล้ว..อิอิ
เจ้าเอ้ย..หวังสิได้สุขใจเบิดถู่อย่าง..สั้นแหล่ว
บ่อยากคิดหมุ่นม้าง..แต่ใจอ้ายดอกส่างเป็น
เป็นกะเว็นกระวายเอ้า...ฮ้อนฮนจนหว่าป่วง!
จักเป็นหยังเด้เจ้า..นอโตอ้ายแหม่นส่างเป็น
บ่เคยเป็นแนวนี้..ทางใจผี่บ่เคยเป็น..
หนั่งคิดไปจนหว่าเย็นยังบ่เห็นทางหายเอ้า
ซอมโตเองคิดหลายหม่องมองโตเองคึดติต่าง
ส่างมาเป็นแนวนี้โอ้ยใจข่อยดอกส่างเป็น.เจ้าเอ้ย..

คันหว่าคิดดีแล้วให้ตรองดูดอกสาก่อนเด๊ะนาง
บ่แหม่นหยังที่อ้ายเว้า..ย้อนห่วงเจ้าสิเก่าหมอง
ตามครรลองที่เผิ่นเว้า..ใจของเฮาเข้าใจข่อง
ให้เข้าใจตัวน้องส่วนโตชายนั้นแล้วแต่
แข่เข้าใจโตน้อง...ส่ำนี้ดอกแหม่นดี
ส่วนหว่าโตอ้ายนี้ย้อนคิดดีเบิดถู่อย่าง
บ่เคยคิดหมุ่นม้างเข้าใจเจ้าดอกสู่แนว
ส่วนหว่าเรื่องที่แล้วผ่านมาบ่คือคิด..สั้นบ้อนาง
เป็นจั่งใด๋อ้ายกะฮู้..โอ้ย! โตอ้ายหว่าสู่แนว
คันหว่าดีแล้วสิยู้...อ้ายสิชูดอกยู้ส่ง..สั้นแหล่ว
สมประสงค์โตเจ้าแล้ว..โตอ้ายจั่งสิหนี..อิอิ
เคยสัญญากับไผบ้างจำได้บ่นอคนดี
บัดนี้ฟ้าฝนมาเสียงคะนองเครงครื้น
เจ้าอย่ายืนกลางแจ้งให้ฟ้าวแหล่นหาหม่องหลบ..เด้อหละนาง
คำสัญญาบ่คือดังฟ้าสิผ่าเด๊ะหัวน้อง
อ้ายนี้คองคอยถ่าเจ้าสิจาบ่เห็นต่าว
ย้านหว่าลืมคำเว้าที่เคยอ้อนต่อผี่ซาย
ตามซำบายโลดเด้อน้องอ้ายบ่หว่าดอกเนียวใด๋
แต่บ่ซำบายใจย้อนสัญญาสาบานไว้
เฮ็ดจั่งใด๋ดอกเด้หล่าถอนคำจาโลดอ้ายหว่า
ย้อนหว่าห่วงเจ้านั้นน้า..ยามเสียงฟ้าคึกคะนอง..
เจ้าเอ้ย..
เผิ่นหว่าน้ำโขงแฮ่ง..ชีมูลยังไหลอยู่
คันคูนาถ่าบักตู้..สิมาส่าวเอาฮุตนา
หายไปไสแล้วนอหล่าบ่กลับมาบ้านเก่า
อ้ายคองหาสิเห็นเจ้า..บัดยามเศร้าอยู่บ่เป็น
ยามตาเว็นต่ำคล้อยอ้ายหนั่งหงอยอยู่เลาะถ่ง
คึดพะวงแต่อี่น้อง..มื้อใด๋หล่าสิต่าวคืน
ตกกลางคืนหมอลำห่าวแต่โตเฮาผัดนอนถ่ง
ตกดึกมานอนสะดุ้ง..ย้อนสายมุ้งอ้ายหว่าหลุด..
บางคืนหลุดปากเว้า..คะนิงนำแต่เนื้ออุ่น
นอนอยู่เดียวเปนตาย้าน..ยามหมาหอนอ้ายใจสั่น
ฮอดยามหนาวนอนสะบั้นได้แต่ฝันดอกคือหว่า
บ่หลูโตนบ้อนอหล่าอดสาเว้าให้เบิ่งแยง
กินของแพงเผิ่นลืมเข้า..กินของเมาลืมน้ำโอ่ง
เหลียวเบิ่งโขงแห้งขอดคึดฮอดชู้อยู่บ่เป็น
นอนกางวันยังฝันพ้อ..โอ้ยนอนางสังมาหน่าย
ย้อนหว่าทุกข์ยากฮ้าย..เพียงฝันพ้อกะแหม่นดี
บ่ได้มีเนียวรั้ง..บ่มีหยังสิโอ้อ่าว..ย้อนหว่าเฮาผู่ฮ้ายแถมพ่วงท้ายอ้ายหว่าจน.

น้องเอ้ย..
อ้ายนี้ใจประสงค์ส่างทางบ่มีกะได้ส่าว..ตั่วหละนาง
บัดทางมีจั่งได้ฟ้าวมาพบพ้อหม่อมพะนาง
เจ้าอย่าไรลืมเลี้ยวทางเทียวที่เคยหย่าง
ใจผี่ชายคงอ้างว้างคันนางน้องบ่หว่าจา
วันเวลาผ่านพ้นใจคนเฮาบ่คือหว่า..สั้นบ้อ
บ่ป็นหยังดอกเด้หล่าโตอ้ายกะหว่าเป็น..อิอิ
ปลากระดี่ได้น้ำฟ้าใหม่นอหลังฝน
คือจั่งคนอกหักฮักพังได้หนั่งเศร้า
บัดแต่มาเจอเจ้า..ใจชายสังมาสื่น..
หัวใจชายคะลาดลื่น..ยืนเศร้าอยู่บ่เป็น
คือน้ำเย็นชะโลมร่าง..แนมทางใด๋หัวใจสื่น
ควมขมขื่นแต่ครั้ง..มะลางเลื่อนจั่งหว่าหาย
ขอบใจหลายเด้หล่า..มาเป็นยาล้างใจผี่
เจ้าผู่ดีเด้จั่งน้องอ้ายคองถ่าอยู่แต่เฮิง...
ซอมเบิ่งเอาเด้อหล่าญาชายสิคือหว่าบ่นอ
ดำข่อหล่อนอต่ำต้อยหัวใจอ้ายสิแหม่นใส..บ่
เป็นจั่งใด๋ให้เฮียนฮู้ขอเป็นหมู่สาเป็นหยัง
บ่อยากเสี่ยงผิดหวังคือจั่งคราวแต่วันกี้

อ้ายนี้คนใจน้อยแต่ใจจริงจั่งคือหว่า..สั้นแหล่ว
ปรารถนาสิพบพ้อคนใจต้องหว่าข่องกัน.
เดือนสามคล้อยอ้ายยังคอยอยู่หม่องเก่า
จนหว่าเดือนสี่แล้วโอ้ยเดือนห้าสิต่าวถึง
จักอี่หยังดึงโตเจ้าหรือใจเขาคอยเฝ้าเกี่ยว
อ้ายนี้เหลียวพ้อว้อสิพบพ้อหน่อพะนาง
เป็นพิสังจั่งบ่ฮู้อ้ายถ่าอยู่เด้อแนวหลัง
เฮ้ดอี่หยังอยู่ไสนอ..อ้ายคนรอนี้รอเก้อ
คันไผเจอเธอฝากบอกให้แหน่แหม่ยังรอ
ผ่อกะคอยควมหวังลูกสาวจบสิคืนบ้าน
จากไปนานมิดสี่หลี่..บ่มีเค้าสิต่าวมา
สุขซำบายดีบ้อหล่าส่งข่าวมากะไคแหน่
อย่าให้แหม่เจ้าถ่าเถียงนาเศร้าเจ้าบ่มา
ปีใหม่เลยแล้วน้าสงกรานต์เลยกะบ่ต่าว
ฝากข่าวมาแหน่เด้อน้องไผคองถ่าอย่าสุลืม.
เหลียวไปทางอีสานกล้ำหนองคายบ้านผี่
ขี้ดินแดงไหง่ง่อง..พายุต้าวหย่าวบักเห็บ
เคยแหล่นเก็บกับอี่น้อง..คราวกี้ตั้งแต่เยาว์
จำได้บ่นอน้องเจ้าสองเฮาคราวหม่วนสื่น
หาเก็บฟืนดังข้างเล้า..ลมหนาวเข้าได้อุ่นคิง
ดังไฟผิงจี่เข้า..มันแกวน้อยส่อยกันหมก
บาดยามตกเดือนห้า..ฝนมาหัวลมป่วน
เคยเหล่นหม่วนกับอี่น้อง..ของเฮือนน้อย..อย่าสุลืม
ส่อยเว้าตื่มแหน่เด้อเจ้า..คันคึดฮอดอย่าสุลืม..เจ้าเอ้ย..

Read more »